LAOAG CITY – Umabot iti 108 nga international observers manipud iti 16 nga organisasion ken delegasion ti agobserbar iti kangrunaan a parliamentary elections ti Bangsamoro Autonomous Region in Muslim Mindanao wenno BARMM ita nga aldaw ti Lunes, Setiembre 14.
Basar iti Office of the Presidential Adviser on Peace, Reconciliation and Unity (OPAPRU), pakairamanan kadagiti observer dagiti mangibagi manipud iti Japan, Australia, United Kingdom, China ken Palestine, pakairamanan pay ti manipud iti European diplomatic community ken sumagmamano nga international democracy ken election-monitoring organizations.
Kaadoan a delegasion ti Asian Network for Free Elections ken National Democratic Institute nga addan ti 22 a miembro, sumaruno ti Embassy of Japan nga addaan ti 17, kabayatan nga sag-14 ti aggapu iti EU-Coordinated Diplomacy ken International Republican Institute.
Naamoan a naisayangkat ti monitoring dagiti observer iti Cotabato City, Maguindanao del Norte, Maguindanao del Sur, Special Geographic Area, Marawi City, Basilan, Tawi-Tawi ken dadduma pay nga election-related facilities.
Segun ken ni Presidential Adviser on Peace, Reconciliation and Unity Mel Sarmiento a napateg ti presensia ti international observers kabayatan nga umakar ti BARMM manipud iti interim government nga agturong iti kangrunaan nga election ti regional parliament.
