LAOAG CITY – Umabot iti 109 a pamilya ti naibakwit manipod iti Barangay Natba, Casilian ken Cabaroan iti ili ti Bacarra iti naiyuswat a preemptive evacuation gapu iti iduduprak ti bagyo Marce.
Daytoy ti inbatad ni Miss Mary Joyce Madamba, ti mangidadaulo iti Municipal Disasater Risk Reduction and Management Office iti ili ti Bacarra.
Segun ken ni Madamba, dagiti nadakamat a barangay ket siguden a malaylayos tunggal adda ti kalamidad kas ti bagyo.
Segun ken ni Madamba, adda dagiti residente a nagkedked a nagbakwit isut gapuna a pinagpirma da dagitoy ti waiver a no adda ti dakes a mapasamak kadakuada ket awan ti sungsungbatan da.
Inlawlawag na a no umadalem ti danom kangrunaan na iti Barangay Casilian ket saan dan a maserrek pay ti nasao a lugar gapu ta kasapulan paylaeng a dumalan da iti karayan.
Mainaig iti daytoy, inbatad ti maysa nga evacuee a ni Mrs. Alma Andres a natallugod da nga agbakwit tunggal adda ti kalamidad kas ti bagyo gapu iti panagamak da a dumakkel manen ti lebel ti danom iti lugar da.
