Natiliw dagiti 11 a construction worker gapu iti illegal a panagsusugal da iti patpatakderen da a balay iti Barangay 17, Sta. Asuncion iti ili ti San Nicolas.
Segun kenni Police Major Joseph Tayaban, ti chief of police iti ili ti San Nicolas, nagturong da iti lugar kalpasan nga adda ti naawat da nga impormasyon mainaig iti panagsusugal dagiti suspek.
Inbatad na nga iti panagresponde da ket ditoy a naaktwan da dagiti nasao a construction workers nga agsusugal partikular ti ay-ayam a “Lucky 9”.
Segun ken ni Tayaban, dagiti natiliw a suspek ket manipod iti ili ti Paoay, San Nicolas ken iti ciudad ti Batac.
Mainaig iti daytoy, kuna ni Tayaban a dagiti dadduma a natiliw ket nagtaya da laeng ngem karaman da latta iti nasao nga illegal nga aktibidad.
Inpakaammo pay ni Tayaban a maysa met laeng kadagiti kaubraan dagiti suspek ti nagreport kadakuada gapu ta mabalin a maasyan iti pamilya dagiti maseknan.
Daytoy ket gapu ta basar iti nagreport kadakuada ket kanayun nga agsusugal dagiti suspek ken uray dagiti sweldo da ket maisugsugal da.
Iti agdama, nagtalinaed dagiti suspek iti kustodyar ti PNP-San Nicolas ken manamnama a maipila intono bigat ti reklamo nga illegal gambling babaen iti inquest kontra kadakuada.
