LAOAG CITY – Natalged a nakasubli ti dadduma pay a 11 a Filipino seafarers a manipud iti MV Magic Seas nga inatake ti Houthi rebels idiay Red Sea.
Iti panangidaulo ti Department of Migrant Workers, nabara a sinaraboda dagiti seafarers iti Ninoy Aquino International Airport (NAIA) Terminal 3 idiay Pasay City a dagitoy dagiti nakalugan a marino iti flight SQ 0918.
Naammoan a dagiti seafarers ket naisalakan ken temporario a nagtalinaed iti Djibouti gapu iti pannakaarinebneb ti nasao a barko.
Maipalagip a karaman dagiti 17 a Filipino seafarers ti naipadamag a nakalugan ti MV Magic Seas idi immatake kadakuada dagiti rebelde idi Hulio 6.
Kabayatanna, inpasingked ni Department of Migrant Workers Secretary Hans Leo Cacdac kabinnulig dagiti dadduma pay nga ahensia kas ti Overseas Workers Welfare Administration (OWWA), Department of Health (DOH) ken Department of Social Welfare and Development (DSWD) a makaawat ti pinansial a tulong ken dadduma pay a benepisio dagiti seafarers kabayatan nga agtultuloy ti imbestigasion iti insidente.
