LAOAG CITY – Natay ti 13 nga indibidual gapu iti dakkel nga uram iti maysa nga apartment idiay Hong Kong.
Napasamak ti uram iti 10 nga high-rise apartment buildings apartment compex iti Tai Po district.
Segun iti gobierno iti nasao a pagilian, adda ti dua nga indibidual nga adda iti kritikal a kondision idinto a ti maysa a tao ket addan iti nasayaat a kasasaad.
Basar kadagiti otoridad, karaman kadagiti pimmusay iti nasao nga insidente ket maysa a bumbero nga agtawen ti 37 idinto a dumanon iti 28 nga indibidual ti nasugatan a naitaray iti ospital.
Iti inisyal nga imbestigasion, adda dagiti sumagmamano a tattao ti naipadamag a napupok kadagiti pasdek ngem saan pay a masinunuo dagiti otoridad no adda pay ti nabatbati iti uneg ti apartment.
Rumrummuar a nangrugi ti apoy iti Wang Fuk Court apartment complex iti agarup alas tres ti malem nga adda ti agarup lima a ribu a residente.
Mainaig iti daytoy, alisto a nagramram ti apoy a nangitunda ti napuskol nga asok no sadinno nga adda ti sumurok 700 a bumbero ti nagtitinnulong tapno masebseban ti apoy.
Naammoan a basar iti Fire Services Department, ti nasao nga uram ket naideklarar kas level 4 fire, ti maikadua a kangatoan a level of severity nga addaan ti 1 agingga iti 5.
Iti agdama, bayat a maisursurat daytoy a damag ket am-ammoen pay laeng dagiti otoridad ti namunganayan ti dakkel nga uram.
