LAOAG CITY – Kinumpirmaran ni Fr. Joey Ranjo, pannakangiwat ti Diocese of Laoag ken Kura Paroko iti simbaan iti ili ti Sarrat ti pannakaideklara kas local, cultural and historical treasure dagiti 13 nga Stations of the Cross iti nasao nga ili.
Ummuna iti daytoy, kiniddaw ti simbaan iti Sang. Bayan iti nasao nga ili a maideklara dagitoy tapno maprotehiran ken maliklikan ti pannakadalapos dagiti Stations of the Cross iti maiyus-uswat a road widening babaen ti gobierno national nga idaulwan ti DILG.
Segun kenni Ranjo, uray saan a naideklara a treasure dagitoy babaen ti National Historical Commission of the Philippines ket inbilang da a historical structures.
Inpannakkel pay ni Ranjo a kadagupan kadagiti ili ditoy probinsya ket ti laengen ili ti Sarrat ti kumpleto kadagiti Stations of the Cross na a naaramid idi panawen ti Espanyol.
Inlawlawag na a no saan a magaraw dagitoy ket dakkel a banag iti turismo nangruna no Semana Santa ken sayang ti “effort” dagiti nagaramid no madadael.
Innayon na a nupay saan a sigurado no makaanay ti panangideklara ti Sang. Bayan kas treasure dagiti Stations of the Cross ket mangnamnama a maaprisyar ti ahensya a mangiyuswat ti road widening.
Naamoan a ti nangisponsor iti nasao a banag ket ni Councilor Mary Anne Damaso.
