LAOAG CITY – Natay ti 14 a tattao ti kalpasan a natinnag ti bus a nagluganan dagiti pasahero manipud India iti maysa a karayan idiay Nepal.
Segun kadagiti opisial, adda agarup 40 a tattao ti lugan ti bus, nga agturong iti Kathmandu City, Nepal manipud Pokhara.
Apaman ti rescue operations iti nakapasamakan ti aksidente iti igid ti karayan ket narigatan dagiti rescuers gubuay ti napigsa a tudo ken nakaro a layus, rason no apay a nagusar dagiti medical team iti helicopter.
Saan pay a nakumpirmaran ti rason ti aksidente ken ti kinasiasino dagiti biktima.
Naammuan a masansan ti aksidente idiay Nepal, gapu kadagiti banag a pakairamanan ti nakapuy a pannakamantener dagiti kalsada ken lugan ken akikid a dalan kadagiti kabambantayan a lugar.
Idi Hulio daytoy a tawen, naruay a tattao ti nayaw-awan kalpasan ti panagreggaay ti daga ti nangyanud iti dua a bus iti karayan Trishuli.
