LAOAG CITY – Naisalakan ti Department of Environment and Natural Resources (DENR) Metropolitan Environmental Office-West ti maysa a 14 a kadapan a Burmese Phyton nga in-surrender ti maysa a pamilya iti Barangay Pio del Pilar, Makati City.
Segun iti DENR, naipan kadakuada ti nasao a Burmese Python kalpasan ti pannakatay ti akinkukua kadaytoy.
Insigida met a nagtignay ti Compliance Monitoring and Enforcement Office ti MEO-West para iti pannakaiwayat ti rescue ken natalged a turnover-na daytoy iti wildlife.
Basar iti inisial nga panangtingiting dagiti opisial ti DENR, addan iti natalged a kondision ti sawa ken awan sagsagabaenna daytoy nga aniaman a sugat wenno pagsinyalan ti pisikal a panangmaltrato.
Agarup 50 a kilo ti kadagsen ti Burmese Python bayat a 14 met a kadapan ti kaatiddogna.
Kalpasn ti rescue, naipan ti sawa iti Wildlife Rescue Center ti Manila Zoo para iti kanayunan a panangtingting bayat a maururay ti umno a pannakadisposisionna. Kabayatanna, nagballaag met ti Departamento iti publiko a liklikan a direkta nga iggaman ken panangasideg kadagiti dadakkel a wildlife, aglalo no makita dagitoy kadagiti residential a lugar.
