LAOAG CITY – Nairekord ti insidente ti nagsaruno a napigsa panagbettak ken nagsaruno nga insidente ti pammaltog, maysa nga aldaw sakbay ti Bangsamoro Parliamentary Elections.
Sakbay iti daytoy, nangiwayat dagiti kapulisan ken Philippine Marines ti naiget a checkpoint iti paset ti Cotabato City National High School Main Campus.
Sumagamano laeng nga oras, naalarma dagiti residente gapu iti naireport nga insidente ti pammaltog iti Rosary Height 10, Cotabato City.
Basar iti immuna nga impormasion, maysa nga agmaris ti nangisit a Toyota Grandia ti limmabas iti nasao a lugar ket apaman a nagsardeng daytoy iti sangoanan dagiti sumagmamano nga indibidual ket ditoyen a kinalabit ti sakay ti nadakamat a lugan ti paltogna.
Segun kadagiti otoridad, awan ti nairekord a biktima wenno natamaan iti nasao a pammaltog.
Iti baet daytoy, kalpasan laeng ti sumagmamano nga oras, naalarma manen dagiti residente kalpasan ti nangngeganda a napigsa a panagbettak iti Purok Amirol, Barangay Mother Bagua Kalanganan, Cotabato City iti oras ti alas-8 ti rabii, Setiembre 13, 2026 a nakasugatan ti maysa a lalaki.
Basar iti imbestigasion ti Police Station 4 ti Cotabato City Police Office, maysa a lalaki ti nairekord a nagsagaba ti sugat a segun iti biktima ket agururay daytoy iti nasao a lugar para iti construction foreman-na ket sumagmamano laeng a minutos ket nakakita daytoy ti naraniag a banag ket ditoyen a nangngeganna ti napigsa a panagbettak.
Gapu iti daytoy, napadata ti biktima ken ditoy a nasagabana dagiti sugat iti nagduduma a paset ti bagina.
Malaksid iti daytoy, maysa manen a napigsa a panagbettak ti naipadanon kadagiti otoridad iti oras ti alas-8:10 ti rabii iti Datu Udtog Matalam, Malagapas, Barangay Rosary Heights 10.
Mainaig iti daytoy, insigida a nagresponde dagiti otoridad iti nakapasamakan ti insidente.
Basar iti immuna nga imbestigasion dagiti otoridad, maipagarup naggapu iti naibunton a basura ti nasao a napigsa a panagbettak.
Awan ti nairekord a natay ken nasugatan iti insidente.
Kabayatanna, iti oras ti alas dose itay parbangon, agsasaruno manen a putok ti paltog ti nangalarma iti maysa a residential area iti Barangay Bagua 2, Cotabato City no sadinno ket kalpasan ti pammaltog, nakita dagiti dua a lalaki a nakabulagta nga adda ti sagsagabaenda a tama ti paltog.
Gapu iti daytoy, agtultuloy ti panangiwayat ti imbestigasion ti Crime Scene Examination Unit tapno maamoan ti rason dagiti insidente ken manarimaanen ti panangtigitingda no adda pakainaigganna dagiti nairekord nga indsidente ti pammaltog ken napipigsa a panagbettak iti Bangsamoro Parliamentary Elections a naikeddeng ita nga aldaw Setiembre 14, 2026.
Kabayatanna, basar iti Commission on Elections, sumurok 2.3 million a registered voters ti manamnama a makipagpaset iti nasao nga eleksion.
