LAOAG CITY – Inpakaammo ni Ms. Antonette Bareng, mangidadaulo ti Business Permit and Licensing Office ditoy siudad ti Laoag a dumanon iti 180 a kiosk iti SM ti naipaayan ti temporario a business permit-na.
Segun kenkuana, temporario laeng a business permit ti naipaay kadagitoy gapu ta adu pay dagiti kurang a dokumento a kasapulan nga ipasada iti opisinada.
Inbatadna a sakbay nga agitedda ti business permit kadagiti kiosk ket masapul a makumpletoda nga umuna dagiti dokumento.
Kunana a ti kangrunaan a kurang kadagiti kiosk a nagaplikar iti dakkel a mall kas ti occupancy permit, building permit ken ti annual inspection fee.
Mainaig iti daytoy, kuna ni Bareng a naikkan ti pawayway dagitoy a mangkumpleto kadagiti dokumentoda agingga inton Hunio 30.
Innayonna a kadagupan kadagiti 180 a kiosk ket 16 laeng kadagitoy ti naipaayan ti business permit-na.
