LAOAG CITY – Umabot ti 194 a pinay nga adda idiay Sharja, UAE ti agpatpatulong iti maysa a foundation a nakabase iti Vienna, Austria.
Daytoy ti inrakurak ni Mr. Elmer Blanco, ti presidente ti Global save life foundation iti Vienna, Austria.
Inbaga na a basar kadagiti nasao a pinay ket kalpasan a nabuya da ti pannakainterview na iti Bombo Radyo ket dagus da a kinontak daytoy babaen iti facebook tapno agkiddaw ti tulong gapu ta marigatan da unayen iti sitwasyon da.
Inistorya ni Blanco a duan a bolan a saan nga agswelsweldo dagiti nasao a pinay gapu ta binaybay-an idan ti pagpapaayan da a kompanya iti kangitingitan ti panagpasar ti covid-19 pandemic.
Innayon na a mangnamnama lattan dagiti maseknan iti tulong dagiti papagayam ken pada da a Pilipino.
Inpakaammo pay ni Blanco nga adda da metten dagiti nakapa-book ngem kanayun a makanselar ti flight da.
Gapu iti daytoy, nagpatulong iti embahada ti Austria tapno makontak na ti konsulada iti Dubai, ken nagaramid ti surat tapno idanun na ti sitwasyon ken matulungan dagiti kadaraan idiay Sharja.
