LAOAG CITY – Inpakaammo ni Mr. Manny Pascua agnanaed idiay Maui, Hawaii nga agamak dagiti Pilipino nga agbakasyon manipud iti estado ti Hawaii.
Daytoy ket gapu ta saan a maawatan dagiti dadduma ti travel ban ni presidente Donald Trump nupay inpasardeng ti korte suprema ti Estados Unidos.
Kuna ni Pascua a maburiburan ti panunut dagiti Pilipino ken ti ammo dan ket maideport ken saan a makasubli iti Amerika manipud iti lugar a nagbakasyonan da.
Inbatad na a saan a karaman ti Pilipinas kadagiti pito a pagilian a naipalaon iti executive order ni Trump.
Maipalagip a dagitoy ket ti pagilian nga Iraq, Iran, Sudan, Libya, Yemen, Somalia ken ti Syria.
Mainaig iti daytoy, inpakaammo ni Pascua a ti kalikagum dagiti dadduma a Pilipino ket nasay-sayaat laengen a dagus nga agaplikar da ti Amerikan citizen no addan ti lima a tawen a panagtalinaed da iti Estados Unidos kangrunaan na iti estado ti Hawaii.
Innayon na a ti rason dagiti Pilipino nga agnanaed idiay Hawaii ket bassit ti panawen da iti panagcitizen gapu ta makumikon da nga agtrabaho.
