LAOAG CITY – Napasamak ti uram iti dua a kabanbantayan ti Iwate Prefecture, Japan a nangrugi idi miyerkules no sadinno nga umaboten iti 1,176 nga ektarya ti kalawa ti nauram a nangitunda met ti pannakaibakwit ti nasurok a sangaribo a residente.
Naamoan a nangrugi ti uram iti Kozuchi district ti ili ti Otsuchi iti oras ti ala-1:50 ti malem.
Alisto a nagwaras ti apoy ken naapektaran ti sumagmamano a pasdek karaman ti kaasideg na a kabanbantayan.
Sumagmamano laeng nga oras kalpasan iti napasamak ket maysa pay nga uram ti rimsua iti kabanbantayan a paset ti Kirikiri district, no sadinno a sumuruk-kumurang a 10 a kilometro ti kaadayo na manipod iti immuna a nauram a kabanbantayan.
Gapu iti risgo, binalakadan ti gobierno dagiti residente nga agbakwit paylaeng.
