LAOAG CITY – Naarestar ti dua a lallaki kalpasan a binagkongda ti dua nga indibidual ditoy siudad ti Laoag.
Naammoan a dagiti biktima ket agtawen ti 34, awanan asawa ken residente ditoy siudad ti Laoag ken agtawen ti 36, awanan asawa ken residente iti ili ti San Nicolas idinto a dagiti suspek ket agtawen ti 29, naasawaan ken residente ditoy siudad ti Laoag ken agtawen ti 23, awanan asawa ken residente met laeng ditoy siudad nga agpapada dagitoy a lallaki.
Basar iti Laoag City Police Station, kabayatan nga agur-uray dagiti biktima iti in-order-da a taraon iti maysa a pasdek panganan ket kellaat a dinanog ken binagkong ti maysa kadagiti suspek ti maysa kadagiti biktima babaen ti screwdriver.
Gapu iti daytoy, napan nangala ti monoblock a tugaw ti kadua ti biktima tapno gandaten nga imalo kadagiti suspek.
Nupay kasta, binagkong met isuna ti suspek iti akinkannigid a luppona babaen ti isu met laeng nga screwdriver.
Insigida a naglibas dagiti dua a suspek kalpasan ti insidente a nagturong iti laud idinto a naitaray dagiti dua met a biktima iti Governor Roque B. Ablan Sr. Memorial Hospital para iti naan-anay a pannakatamingda.
Rumrummuar a ti motibo iti napasamak ket maipagarup nga adda ti saan a panagkinnaawatan dagiti biktima ken dagiti suspek.
Naammoan a dagiti dua a suspek ket adda iti impluwensia ti nasanger ken naarestar dagitoy babaen ti hot pursuit operation.
Kabayatanna, manarimaan a maisagsagana dagiti dokumento para iti pannakaipila ti kaso kontra kadagiti suspek.
