LAOAG CITY – Nagdinnungpar ti dua a pampasahero a tren iti asideg ti Bialosliwie iti laud a paset ti Poland.
Adda ti dua nga indibidual ti nasugatan iti insidente.
Inbatad ni fire brigade spokesperson Pawel Rykowski a ti maysa kadagiti tren ket nagbiahe manipud iti Kolobrzeg nga agturong iti Warsaw East Station idinto a ti maysa ket manipud iti Pila nga agturong iti Bydgoszcz.
Napasamak ti panagdinnungpar iti Bialosliwie agarup alas-6:04 ti rabii oras idiay Poland.
Mapatta-patta nga umabot iti 200 a pasahero ti nakalugan ti dua a tren idi napasamak ti aksidente.
Basar kadagiti video a nagwaras iti social media, makita a nakatakder dagiti pasahero iti igid ti riles idinto nga adda ti sumagmamano a tren ti nadiskaril gapu iti napasamak.
Agtultuloy nga im-imbestigaran dagiti otoridad ti namunganayan ti aksidente.
