LAOAG CITY – Nagpakdaar ni Polish Prime Minister Donald Tusk mainaig iti possible a panagatake ti Russia usar dagiti drone wenno rocket kadagiti pagilian a miembro ti North Atlantic Treaty Organization wenno NATO a mangsupsuporta iti Ukraine, pakairamanan ti Poland.
Segun ken ni Tusk a mabalin nga iruar ti Russia nga aksidente laeng dagiti nadakamat nga insidente tapno mapakapuy wenno malappedan ti desision ti North Atlantic Treaty Organization a sumungbat no matamaan ti teritorio ti maysa a miembrona.
Kuna pay ti Prime Minister nga ad-adda a narigat a madutok dagiti baro a klase ti jet-powered drones gapu ta ad-adda a naalisto ken nangatngato ti tayab dagitoy basar iti intelligence information a naawat ti Poland manipud iti North Atlantic Treaty Organization, Ukraine ken United States.
Inbatad ni Tusk a nakapokus ti Russia iti panagatake kadagiti border crossing tapno malappedan ti supply lines nga agturong Ukraine isu naikeddeng nga agbiahe nga agturong ti Kyiv daytoy tapno trataren ken ni Ukrainian President Volodymyr Zelensky ti depensa kontra kadagiti baro a drone ken kanayonan a sanctions kontra iti Russia.
Nupay kasta, inbatad ni US President Donald Trump nga addan major progress iti plano nga pangipasdek ti permanente nga US Army base iti Poland a nabayagen kiddaw ti Warsaw kas security guarantee kontra iti pangta ti Russia.
