LAOAG CITY – Naminpinsan a nauram ti dua a kadsaaran a pasdek a kukua ni Melanie Ibara Contreras idiay Barangay 6 ditoy ciudad ti Laoag.
Segun kenni Contreras, nakigtot laengen idi nakita na ti dakkel nga apoy iti balay na idi simmangpet kalpasan nga intawag da kenkuana.
Inbatad na a ti laeng adda iti balay da iti mapasamak ti uram ket ti kabsat ken ti anak na, ti anak na nga agay-ayam iti ruwar ken dagiti nagannak na a baket ken lakay a saanen a makagaway.
Kunana a basar ti palawag ti kabsat na ket nangrugi ti uram iti kwarto iti maikadwa a kadsaaran.
Kabayatanna, kuna ni Senior Fire Officer 3 John Patrick Anghel iti BFP-Laoag ket short circuit ti rason ti nangrugyan ti uram gapo ta daanen ti wirings ti balay.
Agpapan maisursurat ti damag ket saan pay a madeterminar ti BFP no mano ti balor dagiti nadadael.
Awan met dagiti nadangran a residente iti napasamak nga uram.
