LAOAG CITY – Nagkamang iti Bombo Radyo Laoag ni Ms. Cyril Somera, residente iti ili ti Badoc ken agbasbasa iti Vigan City, Ilocos Sur tapno masolbar ti problema da nga estudyante seknan iti 20% discount iti plete.
Segun kenni Somera, sipud nangrugi ti klase ket maipagarop a saan da pay a naipaayan ti diskwento babaen kadagiti bus nga addaan ti ruta a Laoag-Vigan.
Inbatad na nga imbes a 70 a pisos iti plete da manipud Badoc agingga iti ciudad ti Vigan ket umabot iti 80 agingga iti 100 a pisos ti masingsingir kadakuada.
Inlawlawag na a kanayon da nga irekreklamo daytoy kadagiti konduktor ngem ibagbaga dagiti maseknan a kastoyen ti singir da.
Kunana a no dadduma nga agreklamo da nga estudyante ket adda dagiti konduktor a maipagarop a nauyong rason nga awan ti mabalinan da.
Inpetteng na nga adda met ti nakapaskil iti uneg ti bus a dagiti estudyante ket addaan ti 20 a porsiento a diskwento ngem saan met a masursurot.
Gapo iti daytoy, kalikagom ni Somera a masolusyonan daytoy a problema da ken mangnamnama a maawatan dagiti drivers ti arungaing da.
Kabayatanna, inpetteng ni Mrs. Francisco Martin, dispatcher ti bus nga addaan ti ruta a Laoag Vigan a naiget met ti monitoring seknan iti singir ti plete.
Segun kenni Martin, adda met ti inyetnag ti Land Transportation and Regulatory Board a fare guide nga isu ti nasken a masurot.
Naamoan a ti plete ti estudyante manipud Laoag agingga iti Vigan ket P125.75 no sadinno a no addda ti mangted ti 120 ket alaen da latta.
Inbatad met dagiti nakasarsarita ti Bombo Radyo Laoag a driver ken konduktor a sursuruten da ken saan da nga agpapada ti singir.
Mainaig iti daytoy, mabalin a no adda ti reklamo ket mabalin da a picturen ti bus wenno alaen ti plate number ken ipadanon da iti LTFRB.
