LAOAG CITY – Manamnama nga agangkat ti Pilipinas ti agarop 200,000 metric tons (MT) a refined sugar inton Setiembre tapno masigurado ti nawadwad nga stocks ken malapdan ti panagngato ti presyo iti merkado.
Segun kenni Agriculture Secretary Francisco Tiu Laurel Jr., aprobaran ti Sugar Regulatory Administration (SRA) board nga idadaulwan na ti importation program kabayatan to ti panagtatarupnong da iti sumaruno a bulan.
Inlawlawag na a mabalin a ngumato pay ti volume agdepende iti deliberasyon iti sitwasyon ti suplay ti asukar iti pagilyan.
Mainaig iti daytoy, inyunay-unay na a ti minimum a 200,000 a metriko tonelada a kaado ti maangkat nga asukar ket tapno malapdan ti mabalin a kinakurang ti stocks intono Agosto agingga iti sumaruno a milling season intono Oktubre.
Innayon ni Laurel daytoy ket iti nagbaetan ti panagapit ken refining season.
