LAOAG CITY – Inrakurak ni Bicol Saro partylist Rep. Terry Ridon, umab-aboten iti 215 a kongresista ti nakasagana nga agbutos a pabor iti impeachment kontra ken ni Vice President Sara Duterte, basar iti konsultasion iti Kamara de Representantes.
Daytoy a bilang ket kapada dagiti nagpirma iti umuna nga impeachment complaint idi Pebrero 2025 nga indeklarar ti Korte Suprema nga unconstitutional gapu iti kinakurang ti due process.
Iti daytoy a gundaway, kumpiansa ni Ridon a maiyuli iti Senado ti Articles of Impeachment gapu ta sumurok daytoyen iti 106 a butos a minimum requirement tapno maipasa ti kaso.
Basar iti report ti House Committee on Justice, nakakita ti probable cause ti komite mainaig kadagiti alegasion ti misuse ti confidential funds nga umabot iti P612.5 milyon pakairamanan ti P448 milyon nga ipaspasubli iti Bise Presidente.
