LAOAG CITY – Natay ti 23 nga indibidual ken 11 ti nasugatan kalpasan a nauram ti maysa a convenience store idiay Sonora, Mexico kagiddan ti pananglagip iti aldaw dagiti natay iti pagilian.
Inbatad ni Carlos Freaner, Presidente ti Mexican Red Cross, karaman kadagiti biktima ti 12 a babbai, 5 a lallaki ken 6 nga ubbing.
Rumrummuar a ti kangrunaan a rason iti pannakatay dagiti biktima ket ti pannakalang-ab dagitoy ti napuskol nga asok.
Inlawlawag ti gobierno ti Sonora a ti insidente ket saan a nairanta ken awan ti pakainaiganna iti terrorist attack.
Agtultuloy ti imbestigasion iti pudno a namunganayan ti nasao nga uram.
Kabayatanna, iti social media post, nangipadanon ti pannakipagladingit ni Mexican President Claudia Sheinbaum Pardo ken inpasiguradona ti alisto a tulong ti gobierno kadagiti pamilia dagiti pimmusay ken dagiti nasugatan.
