LAOAG CITY – Maysa a bank robbery idiay Naples, Italy ti nangitunda ti naiget a police operation kalpasan nga hinostage dagiti armado a lallaki ti 25 nga indibidual iti uneg ti bangko.
Nangrugi ti insidente idi serreken dagiti suspek ti maysa a sangay ti Crédit Agricole.
Insigida a nagresponde ti pulisia ken pinalikawkawanda ti pasdek kabayatan a mapaspasamak ti hostage situation.
Iti uneg ti agarup dua nga oras, nakinegosasion dagiti otoridad agingga a nawaya-wayaan dagiti amin nga hostages.
Segun kadagiti opisial, awan ti nakaro a nadangran iti insidente ngem sumagmamano kadagiti hostage ket naikkan ti medical assistance gapu iti pannakakigtot ken trauma.
Inbatad ti sumagmmano a nakalasat a naibalud dagitoy iti maysa a pasdek nga armado dagiti suspek ngem awan ti dinangranda kadakuada.
Makita kadagiti video dagiti bumbero a binuongda ti tawa tapno tulungan dagiti tattao a makaruar.
Naobserbaran nga agtegtegerger dagiti hostages ken emosional idi nawaya-wayaan dagitoy.
Nangiwayat ti assault ti special forces ti carabinieri ngem naduktalan a nakalibasen dagiti suspek iti babaen ti maysa a tunnel a posible a konektado iti sewer system.
Basar kadagii report, saanen a masinunuo ti pakabuklan a gatad ti tinakaw gapu ta saan a cash ti target dagiti suspek no diket ti personal safety deposit boxes.
Agtultuloy ti imbestigasion ken manhunt operations kadagiti naglibas a suspek.
