LAOAG CITY – Kinumpirmaran ni French President Emmanuel Macron nga umabot iti 26 a kaalyado a pagilyan ti manamnama a mangideploy ti tropa da iti Ukraine, no addan to ti ceasefire deal iti nagbaetan da iti Russia.
Daytoy ti addang dagiti European countries a nagatendar iti “Coalition of the Willing” summit idiay France.
Segun kenni Macron, dagus da a mangipatulod ti pwersa tapno saanen nga uliten ti Russia a panangraot na iti Ukraine a nangrugi idi tawen 2022.
Inbatad na nga iti sumarsaruno nga aldaw ket isu met ti panangammo da no nakasagana ni US President Donald Trump a mangideploy iti soldado ti Amerika.
Ummunan nga inbatad ni Trump a no suportaran ti Amerika ti Ukraine ket babaen iti air support ngem agpapan ita ket awan pay ti kumpirmasyon na.
Kageddan ti rakurak ni Ukrainian President Volodymyr Zelensky a nakasarita da kenni Trump para iti maximum protection iti tangatang ti Ukraine.
Maipalagip nga inpetteng idin ti Moscow a rumbeng nga awan ti maiwaras a tropa ti Western countries iti Ukraine, ngem agtultuloy met ti panangipatulod ti Russia iti tropa na iti Ukraine iti laksid nga addan dagiti gandat a saritaan pakaseknan iti kapya.
Mainaig iti daytoy, arig na kimmapoy ti namnama para iti katulagan a manglippas iti gubat sipud iti nagbalin a taripnong ni Trump kenni Russian Presient Vladimir Putin idiay Alaska iti napalabas a bulan.
Kabayatanna, ginutigot ni Trump ti European Union a saan dan a gumatang wenno agangkat ti krudo manipud iti Russia.
