LAOAG CITY – Positibo ti naiyuswat a search warrant iti Barangay Nalbo ditoy ciudad ti Laoag babaen iti PNP-Laoag, PDEA, PDEU ken RDEU.
Nabigbig ti subject ti operasyon a ni Daryll Barroga, agtawen ti 23, driver ken maibilang nga APOR ken residente iti nasao a barangay.
Nakailanad iti search warrant nga inyetnag ni Judge Francisco Quilala iti RTC Branch 14 a ti sukimaten dagiti otoridad ket iligal a droga.
Sakbay a simrek ti search team iti pagtaengan da kinapkapan da ni Barroga ken ditoy a naala da manipud iti bulsa na ti 27 a sachet ti maatap a shabu.
Malaksid iti daytoy, naala pay dagiti otoridad iti kwarto ti subject ti maysa a kalibre 22 a paltog ken addaan ti tallo a bala, maysa a sachet ti maipagarop a shabu, lighter ken drug paraphernalia.
Mainaig iti daytoy, kuna ti ama ni subject a ni Mr. Constante Barroga a nasingpet ti anak na ken awan ti ammo na nga agik-ikot ti paltog ken droga daytoy isut gapo na a masdaaw.
Inpetteng met ti subject a planted wenno naimula dagiti nakumpiskar kenkuana a droga ken paltog.
Kabayatanna, kuna ni Police Chief Master Sergeant Harold Nicolas, mangidadaulo ti PDEU a ti subject ket karaman iti target list ti PDEA, adda iti reigonal level iti drug watchlist ti PNP ken miembro ti RAPISORA drug Group.
Inlawlawag ni Nicolas nga addan ti nadeterminar da no siasinno ti maysa kadagiti pagal-alaan ni Barroga ti droga ditoy Rehiyon 1, ken dagiti dadduma nga iligal a droga ket aggapo idiay Manila.
Iti agdama ket adda iti kustudiyar ti PNP-Laoag bayat a maisagsaganan ti maipila a reklamo kontra kenkuana.
