LAOAG CITY – Inaprobaran ti Bangko Sentral ng Pilipinas (BSP) ti agdagup a $3.81 bilion a public sector foreign borrowings para iti maikatlo a kuarter ti 2024.
Daytoy nga addang ket paset ti agtultuloy a panangisiguro ti gobierno iti kanayonan a pondo para kadagiti proyekto.
Mausar dagiti nabulod a pondo para kadagiti nagduduma a proyekto, pakairamanan ti imprastruktura, salun-at, edukasion, ken dadduma pay a kangrunaan a sektor.
Dagitoy a proyekto ket manamnama a mangpapigsa iti ekonomia ti pagilian ken mangpennek kadagiti kasapulan dagiti umili.
Mainaig iti daytoy, ti panagutang iti ballasiw-taaw ket paset ti estratehia ti gobierno tapno agtalinaed a natalged ti ekonomia bayat nga agtultuloy ti panagsublina manipud iti epekto ti pandemia.
Inpasigurado ti Bangko Sentral ng Pilipinas a dagitoy a pautang ket makagunggona iti napaut a panagdur-as ti pagilian.
