LAOAG CITY – Natay ti tallo nga indibidual kalpasan iti napasamak ti pammaltog iti maysa nga eskuelaan idiay Bosnia.
Dagiti biktima ket staff amin ti maysa a high school iti ili ti Sanski Most.
Basar iti impormasion ti nausar nga armas ket ti automatic rifle no sadinno immuna a napatogan ti dean, sekretario ken maysa nga English teacher a nagretiro ken nagsubli a mangisuro.
Nupay kasta, awan dagiti agadadal ti nasugatan iti nadakamat nga insidente gapu ta oras ti bakasion idyay Bosnia.
Binigbig dagiti otoridad ti suspek a ni Mehmed Vukalic, maysa a cleaner iti nasao a pagadalan.
Kabayatanna, nasugatan ti tian ti suspek gapu iti gandatna nga agpakamatay.
Iti agdama, agtultuloy pay laeng ti imbestigasyon dagiti otoridad no ania ti motibo ti suspek iti nasao nga insidente.
