LAOAG CITY – Inpakaammo ni Senior Fire Officer 3 Bernard Agcaoili, ti Acting Municipal Fire Marshal ti Bureau of Fire Protection iti ili ti Badoc a nasurok-kumurang 300 a ribu a pisos a kuarta ti nairamraman a dimmapo iti nauram a pagtaengan iti Brgy. 1, Canaan iti nasao nga ili.
Segun kenni Agcaoili, agarup 6:15 idi malem kalman idi adda naawat ti Fire Station-da a report nga adda ti maur-uram a pagtaengan rason a dagus met dagitoy a nagresponde.
Inbatad na a basar ni Mr. Edmar Salvador, ti akinkukua ken agnanaed iti nasao a pagtaengan, ti kuarta ket mausar a pagpaagas ti anak na a lalaki nga addaan ti sagubanit iti mata.
Basar met iti inisyal nga imbestigasion ti BFP Badoc, nangrugi ti uram iti maysa a kuarto ti bunggalo a pagtaengan a nakaidulinan ti dakkel a gatad ti kuarta.
Kunana a posible a dagiti nabaybay-an a naka-charge a cellphone ken rechargeable nga electric fan ti nakaitunda iti napasamak nga uram.
Inpalgak na nga alisto a nagramram ti apoy gapu ta naaramid ti light materials ti nasao a kuarto rason a naminpinsan a dimmapo dagiti naruay nga alikamen ken appliances iti uneg ti pagtaengan.
Inlawlawag na a gapu iti alisto a panagramram ti apoy ket adda pay ti nairamraman a maysa a pagtaengan a kukua ken pagnanaedan ti kabsat met laeng ni Salvador nga awan pay ti maysa a metro ti kaadayona.
Nupay kasta, kunana nga awan met dagiti nasugatan iti napasamak nga uram.
Naammoan a dua a fire truck ti napan nagresponde manipod iti ili ti Badoc ken Pinili ken naideklara a fire out kalpasan ti dua ken gudua nga oras a panagsebsen iti apoy.
Kabayatanna, kuna ni Senior Fire Officer 3 Agcaoili a mapatta-patta nga umabot iti kagudua a milyon a pisos ti balor ti nadadael a pagtaengan.
