LAOAG CITY – Adda ti 4,277 a baro a nairekord a kaso ti Human Immunodeficiency Virus (HIV) para iti maikapat a quarter ti 2025.
Iti report, kaadoan kadagiti kaso ket lallaki nga addaan ti bilang a 4,038 idinto a 239 met kadagiti babbai.
Mainaig iti daytoy, dagiti pasiente nga agtawen ti 25 agingga 34 ti nangbukel ti 45% wenno 1,929 a kaso, sumaruno dagiti agtawen ti 15 agingga 24 nga addaan ti 32% wenno 1,361 a kaso.
Makapadanag pay ti 15 a kaso dagiti pasiente a naub-ubing ngem agtawen ti 15.
Iti baet a nababbaba daytoy maidasig iti 5,583 a kaso idi maikatlo a quarter ti 2025, nakairekord latta ti 47 nga average a kaso iti kada aldaw manipud Oktubre agingga Disiembre.
Iti kapada a panawen, adda ti pakabuklan a 1,069 a pasiente ti addaan ti advanced Human Immunodeficiency Virus disease.
Iti pakabuklan, umaboten iti 163,454 ti nairekord a kaso ti Human Immunodeficiency Virus manipud Enero 1984 agingga Disiembre 2025.
Iti baet daytoy, inrakurak ti Department of Health nga aktibo dagiti pasiente iti panagbirbiruk ti tulong no sadinno a 4,760 ti baro a nag-enroll para iti Pre-Exposure Prophylaxis (PrEP).
