LAOAG CITY – Natiliw dagiti uppat a lallaki iti Brgy. 30, Cadaratan iti ili Bacarra.
Daytoy ket kalpasan a balligi a naisayangkat ti Anti-Illegal Gambling Operation iti Philippine National Police iti nasao nga ili.
Segun ken ni Police Lieutenant Colonel Roldan Suitos, ti Hepe iti Philippine National Police iti ili ti Bacarra, nabigbig dagiti suspek nga agtawen ti 37, awanan asawa, residente ti Brgy. San Lorenzo iti ili ti Bangui, agtawen ti 42, naasawaan, residente ti Brgy. Ablan, iti ili ti Burgos, agtawen ti 37, naasawaan, residente ti Brgy. Davila iti ili ti Pasuquin ken agtawen ti 25, awanan asawa, residente ti Brgy. Ablan iti ili ti Burgos.
Inbatadna a naarestar dagiti maseknan nga indibidual kalpasan a naatuaran dagiti otoridad nga agay-ayamda ti pepito iti uneg ti naka-parking a van.
Gapu iti daytoy, kunana a nakumpiskar ti 880 a pisos a mapapati a pusta dagiti suspek, 52 a pedaso ti red playing cards pakairamanan ti maysa nga unit ti Nissan Urban nga agmaris ti puraw nga addaan ti plate number AAI 9962.
Innayonna a mapilaan ti kaso dagiti uppat a lallaki gapu iti panagsalungasingda iti Presidential Decree 1602 wenno ti Illegal Gambling Law.
Kabayatanna, naammoan a nagusar dagiti otoridad ti Alternative Recording Device bayat ti pannakaisayangkat iti nasao nga operasion.
