Natay ti dua nga indibidual kalpasan nga inarado ti van ti uppat a motorsiklo iti paset ti Barangay Ab-abut iti ili ti Piddig.
Segun iti Investigation Group iti Philippine National Police Piddig, ti nagmaneho ti black Honda TMX 125 ket nabigbig a ni Antonio Gaoat, 57, naasawaan ken residente ti Barangay Puttao ili ili ti Solsona.
Idinto a ti nagmaneho ti black Rusi 110 motorcycle ket ni Esrael Javillonary 28, naasawaan, ken lubbonna ti anakna, 3 years old a residente ti Barangay Puttao iti ili ti Solsona.
Ti maikatlo a motor a red/black Euro ket inmaneho ni Jerome Agmata,30, addaan ti live- in partner ken inlubbonna na met ni Jerry Agmata 59, agpada a residente iti Barangay Barcelona iti ili ti Solsona.
Ken ti maika-uppat motorsiklo ket inmaneho ni Apolinario Toribio Jr. 44, addaan ti live-in partner ken residente ti Barangay Puttao iti ili ti Solsona a naglugan ti red Euro motorcycle.
Naamoan a dagitoy nga uppat ket agpapada a construction worker.
Kabayatanna ti suspek a nagmaneho ti van ket nabigbig a ni Rudy Nacorda, 64 yrs old, naasawaan, mannalon kadwana iti pasaherona a ni Fedimar Taylan nga agpada a residente iti Barangay Tangaoan iti ili ti Piddig.
Basar iti inisyal nga imbestigasion dagiti otoridad, apaman nga agpaabagatan a direksion dagiti nakamotor nga aggapo iti trabahoda iti ili ti Vintar nga agawid iti ili ti Solsona idi kellaat nga immagaw ti linya ti van nga agpaamianan a direksion a rason nu apay a nagderetso ken nadungpar iti 4 nga agsasaruno a motor no sadinno a nai-purwark dagiti nakalugan ti addaan kaadayo ti 3 agingga iti 20 a metro.
Gapi iti daytoy, insigida a naitaray iti balay pag-agasan iti ili ti Piddig ket naideklarar a dead-on arrival ti dua nga isuda ni Antonio Gaoat ken Apolinario Toribio Jr. idinto a dagiti tallo a kadwada ket nagsagaba ti sugat iti nagduduma a paset iti bagida idinto a dagiti dadduma ket saan a naan-ano.
Innayon pay ti Philippine National Police Piddig (PNP) Piddig a basar ti liquor test, ket nakainom ti nasanger nga arak ti driver ti van.
Iti agdama ket isagsaganan dagiti otoridad dagiti dokumento a kasapulan iti panna-kaipila ti kaso iti suspek.
