LAOAG CITY – Naipaiman iti House Committee on Justice ti uppat a verified impeachment complaints kontra ken ni Vice President Sara Duterte.
Gapu iti daytoy, nangrugin ti 1-year bar rule, kayatna a saoen ket saanen a mabalin a mangipila ti impeachment complaint kontra ken ni Vice President Duterte agingga inton Pebrero 23 ti sumaruno a tawen.
Ti Committee on Justice ti mangtingiting no sufficient in form and substance dagiti nadakamat a reklamo nga impeachment kontra ken ni Vice President Duterte.
Mainaig iti daytoy, naipila ti umuna a reklamo idi Pebrero 2 babaen ti Makabayan Coalition ken inyendorso da Partylist Representatives Antonio Tinio ti Alliance of Concerned Teachers, Sarah Jane Elago ti Gabriela Women’s Party ken Renee Louise Co ti Kabataan.
Iti kapada nga aldaw, inpila ti maikadua nga impeachment complaint dagiti pannakabagi dagiti nagduduma a progresibo a grupo ken civil society groups nga inyendorso da Party-list Representatives Leila de Lima ti Mamamayang Liberal ken Perci Cendaña ti Akbayan.
Naipila met ti maikatlo nga impeachment complaint kontra iti Bise Presidente idi Pebrero 9 babaen iti pannakabagi ti simbaan, civil society leaders ken dagiti abugado nga inyendorso ni Congreswoman De Lima.
Kabayatanna, idi Mierkoles inpila ti maikapat a reklamo ni Atty. Nathaniel Cabrera ken inyendorso da Representatives Bienvenido “Benny” Abante Jr. ti Manila ken Paolo Ortega V ti La Union.
