LAOAG CITY – Umaboten iti 5.1 million ti bilang dagiti indibidual a naapektaran ti habagat, Bagyo Luis ken Bagyo Maymay basar iti maudi a datos ti Department of Social Welfare and Development (DSWD) Disaster Response Management.
Manipud iti daytoy iti sumurok nga uppat a ribo a naapektaran a barangay iti National Capital Region, Cordillera Administrative Region, Region 1 agingga 3, CALABARZON, MIMAROPA, Regions 4, 5 ken 9.
Kabayatanna, silulukat ti sumurok 300 nga evacuation centers kadagiti nasao a rehion no sadinno temporario nga agtalinaed ti sumurok 600 a pamilia wenno katukad ti sumurok 21,000 nga indibidual kabayatan a sumurok 11,000 a pamilia wenno katukad iti sumurok 42,000 nga indibidual ti temporario nga agtalinaed kadagiti kaam-ammo ken gagayyem.
Iti agdama, agdagup P700 million ti humanitarian assistance nga ibunong ti DSWD kabayatan a sumurok P4.83 billion ti available a resources ti ahensia.
