LAOAG CITY – Natay ti lima nga indibidual kalpasan ti karambola ti sumagmamano a lugan idiay Virginia.
Basar kadagiti kapulisan, napasamak ti aksidente iti interstate 95 no sadinno nga inararo ti pampasahero a bus ti sumagmamano a lugan iti sangoananna.
Nauram pay ti maysa a lugan gapu iti nakaro a pannakaidungparna nga adda ti uppat a tattao ti pimmusay iti uneg ti nasao a lugan.
Karaman kadagiti natay nga adda iti kotse ket ti agtawen ti 13 nga ubing a babai ken maysa nga agtawen ti 7 nga ubing a lalaki nga agpapada a residente iti Greenfield, Massachusetts idinto a ti agtawen ti 25 a babai a residente ti Worcester, Massachusetts ket natay iti uneg ti SUV daytoy.
Adda ti 44 a dadduma pay ti naitaray iti ospital a nagsagaba ti sugat gapu iti aksidente.
Agtultuloy nga am-ammoen dagiti otoridad ti namunganayan ti aksidente no sadinno nga isagsaganadan ti kaso kontra iti driver ti bus a nabigbig a ni Jing S. Dong manipud iti Staten Island, New York.
