LAOAG CITY – Inpannakkel ni Police Lieutenant Colonel Andrew Rabang, ti Hepe iti Philippine National Police ditoy siudad ti Laoag nga umabot iti 514 dagiti naglabsing iti Traffic Ordinance ditoy siudad.
Segun kenkuana, pammaneknek daytoy a naiget ti panangipatungpalda iti nasao nga ordinansa no sadino ket umaboten iti nasurok lima gasot ti naikkan ti citation ticket manipod Marso 11 agingga Marso 17 ita a tawen.
Inbatadna nga umabot met iti pakabuklan a 498,250 a pisos ti multa dagiti naikkan ti citation ticket gapu kadagiti nagduduma a traffic violations iti intero a probinsia ti Ilocos Norte.
Malaksid iti daytoy, kunana a naiget ti panangtiliwda kadagiti agisaysayangkat ti iligal a panagsusugal no sadino adda dagiti natiliwanda iti kallabes.
Inlawlawagna nga adda pay ti tallo nga indibidual ti nangideposito dagiti paltog dagitoy kas paset pay laeng iti panangitandudoda iti programa nga Oplan Katok.
