LAOAG CITY – Umabot iti innem a maladaga ti natay kalpasan a nauram ti maysa nga ospital iti Vivek Vihar region idiay New Delhi, India.
Inbatad ni Senior police officer Surendra Choudhary nga adda ti 12 a maladaga iti nasao nga ospital idi napasamak ti insidente.
Inrakurak ni Delhi Chief Minister Arvind Kejriwal a ti napasamak nga uram ket makapadudog ti puso kangrunaan na ket maladaga dagiti nagbalin a biktima.
Inpalgak ni Kejriwal a mangipatungpal da ti legal action kontra iti akinkukua iti ospital gapu iti panaglibas na kalpasan ti insidente.
Iti agdama, agtultuloy ti imbestigasyon dagiti otoridad seknan iti insidente, ken inkari da a saan a makaliklik ti siasinno man a responsable iti napasamak nga uram.
Naamoan nga alisto a nagramram ken dimmakkel ti apoy gapu iti panagbettak dagiti oxygen cylinder ken umabot iti 14 a fire trucks ti nagtitinnulong a nangsebseb ti apoy.
