LAOAG CITY – Nasugatan dagiti 6 nga ubbing ken driver ti tricycle kalpasan a a dinungpar ti maysa met laeng a tricycle iti Batac-Banna Road iti paset ti Brgy. San Mateo iti ciudad ti Batac.
Nabigbig ti driver ti tricycle a nangilugan ti 6 nga ubbing nga inturong ni Ralph Catubay, 22, residente iti Brgy. 2 iti ili a Paoay idinto a ti nakadungpar kadakuada ket maysa a tricycle nga inturong ni Roger Raquita, naasawaan, construction worker, ken naikamang iti Brgy. San Mateo, Batac.
Basar iti imbestigasyon, bayat nga agpapaadaya a direksyon ni Raquita idinto nga agpapalaud met a direksyon ni Catubay.
Ni Raquita ket maipagarup nga adda iti kalin-linnumba na a lugan idinto a dalyasaten na iti maararamid a kalsada ket dita nga immagaw iti linya rason a nadungpar na ti tricycle ni Catubay.
Naitaray dagiti dua a driver ken dagiti pasaheros ni Catubay iti Mariano Marcos Memorial Hospital and Medical Center para iti naan-anay a pannakataming da.
