LAOAG CITY – Inaprobaran ni Presidente Ferdinand Marcos Jr. ti panangiyalud-od ti 7-year limit para iti kualipikado a Pantawid Pamilyang Pilipino Program (4Ps) beneficiaries.
Daytoy ket basar iti Executive Order No. 120 a pinirmaan ni Presidente Ferdinand Marcos Jr.
Inaramid ti Presidente ti addang kagiddan ti rekomendasion ti National Advisory Council para iti extension kas wagas tapno maalay-ayan ti epekto ti krisis iti pagsapulan dagiti benepisiario.
Basar iti Executive Order, mabalin latta a makaawat ti ayuda dagiti benepisiario agingga nga agtaltalinaedda a karaman iti Level 1 wenno survival ken Level 2 wenno subsistence basar iti Social Welfare and Development Indicator (SWDI) ti Department of Social Welfare and Development (DSWD).
Segun iti pammilin, makitkita ti gobierno ti nagbalin nga epekto ti napalabas a pandemia a nangipababa iti birok ti naruay a pamilia ken nangitantan iti panagdur-asda.
Gagem ti Executive Order a masigurado nga agtultuloy a makaawat ti umdas a suporta dagiti benepisiario agingga a madanonda ti tukad ti panagbalin a self-sufficient wenno umdasen ti kabaelan tapno masupusupan dagiti kasapulanda.
Inbilin ti Department of Social Welfare and Development a papigsaen ti case management system ken usaren ti naig-iget a Social Welfare and Development Indicator tapno maarisit no nakasaganan nga agturpos iti programa ti tunggal benepisiario.
