LAOAG CITY – Kalikagum ti 70 nga indibidual nga ag-enroll kadagiti vocational course iti extension ti Mariano Marcos State University iti ili ti Nueva Era.
Segun ken ni Mayor Aldrin Garvida, adda ti 30 manipud iti ili ti Nueva Era, 1 iti Abra, 3 iti Badoc, 7 iti Pinili, 3 iti Marcos ken 23 iti Banna.
Inbatadna a dagiti vocational course ket ti food processing, forestry, computer technology, construction technology, electrical ken electronics technology.
Kunana a ti panangrugi ti nasao a pagadalan ket kagiddan met ti pannakaipaay ti libre a lugan para kadagiti estudiante nga ibaklay ti Local Government Unit pakairamanan ti krudo.
Inlawlawagna nga agtultuloy ti panagawatda kadagiti interesado a manggundaway kadagiti vocational course.
Nagyaman met ti Mayor iti national ken local government ti panangsuportada iti daytoy a kalikagumna.
