Umaboten iti 700,000 a benepisiario a trabahador ti naikkan iti pinansial a tulong babaen kadagiti livelihood programs ti Department of Labor and Employment (DOLE) idi Labor day, Mayo 1.
Iti babaen ti Tulong Panghanapbuhay sa Ating Disadvantaged Workers (TUPAD) program ti ahensia, agdagup iti 673,480 a trabahador ti naikkan iti tulong pinansial nga aggatad iti nasurok P3.377 billion.
Karaman kadagiti benepisiario ket 200 a decommissioned combatants ti Moro Islamic Liberation Front (MILF) manipud iti nagduduma nga ili iti Basilan.
Nagtrabahoda iti 30 nga aldaw ket tunggal maysa kadakuada ket nakaawat iti P 10,080.
Nakaawatda pay kadagiti personal safety equipment ken micro-insurance bayat ti temporario a panagtrabahoda.
Kabayatanna, babaen ti Department of Labor and Employment Integrated Livelihood Program wenno Kabuhayan Program ket agdagup iti 35,598 nga indibidual ti naikkan iti livelihood assistance nga aggatad iti nasurok P706 million.
