LAOAG CITY – Nakagun-od ti baro a world record dagiti walo nga agtutubo kalpasan a mabisitada amin dagiti 272 a London Underground station iti uneg ti ababa laeng nga oras.
Kinumpirmaran ti records keeping organization a Guinness World Records a ti grupo nga “Amersham Ambushers” ti baro a world record holder ti titulo a “Fastest Time to Travel to all London Underground stations.”
Daytoy ket kalpasan a mabisitada amin dagiti 272 nga istasion iti las-ud laeng iti 18 nga oras, 8 a minuto ken 13 a segundo.
Naammoan a ti Amersham Ambushers ket bukbuklen dagiti walo nga agpapagayam nga agtawen iti 16 ken 17 no sadino train enthusiast dagitoy ken nangrugi ti panagpagayamda gapu ta mahiligda kadagiti tren. Nangrugi ti record attempt-da iti Heathrow Terminal 5 station ken nagleppas iti Amersham Station.
