LAOAG CITY – Mapatta-patta nga umabot iti 9.2 milyon a pamilya a Pilipino, wenno 35 a porsiento, ti nangibaga nga isuda ket marigrigat iti umuna a kwarter ti 2026.
Daytoy ket maibasar iti Tugon ng Masa survey ti OCTA Research.
Ti nasao a datos ket nababbaba no ikompara iti 37 a porsiento wenno 9.8 milyon pamilya iti immuna a survey idi Disyembre 2025.
Nupay kasta, segun iti OCTA Research, nakastrek iti 2 a porsiento a margin of error ti panagbalbaliw isut gapuna a saan a maibilang daytoy a napateg ti nagbababaan na.
Naisayangkat ti survey manipud Marso 19 agingga iti 25 iti 1,200 a respondents.
Bimmaba ti self-rated poverty iti Metro Manila ti 12 a puntos ken iti Mindanao ti 11 a puntos, ngem ngimmato iti Luzon ti 3 a puntos ken 4 puntos iti Visayas.
Karaman kadagiti rehiyon a nakairekord ti dakkel a nagngatoan ket ti Cordillera Administrative Region, Negros Island Region, Cagayan Valley, Central Visayas, Bicol Region, ken CARAGA, idinto a bimmaba met iti Northern Mindanao, Eastern Visayas, MIMAROPA, ken Davao Region.
