LAOAG CITY – Naipaayan ti balay dagiti 9 a pamilya ditoy ciudad ti Laoag babaen ti programa a “core shelter assistance” iti lokal a gobierno ken ti Department of Social Welfare and Development Office.
Segun ken ni Mrs. Perlita Cabello, ti mangidadaulo ti City Social Welfare and Development Office, ti lokal a gobierno ti nagiplastar iti lote idinto a ti Department of Social Welfare and Development ti nangted iti pondo para iti pannakaipatakder dagiti balay.
Kagiddan iti daytoy, kunana a naipama payen dagiti sertipikasyon a mangpaneknek nga addaanen ti bukod a balay dagiti benipisiaryo iti nasao a programa.
Kuna ni Mrs. Cabello a kalikagum ti lokal a gobierno a maitultuloy daytoy a programa tapno maaddaan iti pagtaengan dagiti umili ditoy ciudad kangrunaan na kadagiti nadidigraan, agup-upa ken dagiti saan a makabael a mangipatakder iti bukod da a balay.
Inpakaammo na nga agarup 108 aminen dagiti naipatakder a balay babaen iti programa a “core shelter assistance” ken mangnamnama a manayunan pay dagitoy.
Inpaganetget na a ti tunggal umili ket napateg a maddaan iti bukod a balay gapu ta daytoy iti mangpatibker iti maysa pamilya .
