LAOAG CITY – Nagballigi dagiti otoridad iti inyuswat da nga entrapment operation iti Dap-ayan ditoy ciudad ti Laoag.
Nabigbig ti suspek a ni Melinda Pambid Anday, agtawen iti 58, naasawaan ken taga Barangay 35, Pipias iti ili a Bacarra idinto a ti biktima ket ni Lina Tumamao Sacuco, agtawen iti 42, naasawaan ken residente iti Barangay 15, San Marcos iti ili a San Nicolas.
Segun ti report, inkari ni Anday iti biktima nga iruwar na ti asawa na a ni Orlando Tumamao nga agdama a nakabalud iti Ilocos Norte Provincial Jail (INPJ) gapu ti kaso na a panaglabsing iti RA 9165 kasukat iti dakkel a gatad.
Naamoan nga nga idi 2016 ket inikkan ni Sacuco ti 100 a ribo a pisos ni Anday.
Nupay kasta, idi laeng kalman ket nagpanayun ti suspek iti 4 a ribo a pisos isut gapuna a nagpatulong ti biktima kadagiti otoridad ken ditoyen a naiyuswat ti operasyon.
Nagkedked metten a nagpainterview ti suspek ngem iti pannakisarsarita kenkuana iti Bombo Radyo ket naiget a naglikudan na ti alegasyon kontra kenkuana.
Iti agdama ket nagtalinaed ti suspek iti kustodyar ti PNP ditoy ciudad ti Laoag.
