LAOAG CITY – Nabayagen a problema dagiti addaan ti piskarya iti Barangay Gabu ditoy ciudad ti Laoag ti pananglamot dagiti nagduduma a klase ti tumatayab dagiti pupuk da nga ikan.
Daytoy ti kinumpirmaran ni Barangay Chairman Gil Ramos iti nasao a barangay.
Segun kenni Ramos, maibus dagiti pupuk nga ikan iti peiskarya da iti uneg laeng ti makalawas gapo kadagiti tumatayab.
Inbatad na pay a no agdisson dagiti tumatayab ket awan ti makita a danom ti piskarya gapo iti kinaado da.
Karaman kadagiti tumatayab a mangmangan kadagiti ikan a taraken da ket ti kannaway ken ti “papa” nga ibilang na a naranggas a manglamot kadagiti ikan nangruna kadagiti bangus partikular iti rabii.
Inlawlawag na a no aggapo iti amyanan ti angin ket isuda ti panagado dagiti migratory birds nga umatake kadagiti pupuk da nga ikan.
Mainaig iti daytoy, kuna ni Ramos nga awan pay ti makita da a solusyon iti nabayagen a problema da nga agtartarakeb.
Kunana nga inpadanon da iti biang ti fisheries ti parikot da ngem arig na marigatan dagiti maseknan a mangkita ti solusyon.
