LAOAG CITY – Saan a dimmanun iti ICU ti Mariano Marcos Memorial Hospital and Medical Center idiay siudad ti Batac ti biktima ti panagdangran iti ili ti Paoay iti laksid a naawanan ti poot kalpasan nga intaray ti principal ken adviser na
Kinumpirmaran daytoy ni Mr. Jeff Agcolicol, uliteg ti biktima nga estudyante ti Paoay National High School.
Segun ken ni Agcolicol, nagpatingga laeng ti kaanakan na iti emergency room ti ospital.
Kuna na a grade 11 dagiti nangdangran iti kaanakan na a saan ketdi a Grade 10 a kas iti kaanakan na.
Inbatad na a ti sitwasyon ti kaanakan na iti agdama ket limteg ti akin kannigid a mata na ken masapul iti pannakaopera ti agong na kalpasan a nadis-align.
Inlawlawag na nga addan inisyal a saritaan da kadagiti nagannak dagiti nangdangran iti kaanakan na ket pabayadan na dagiti nagastos na iti pannaka-ospital ti kaanakan na.
Rumrumwar a ti motibo ti nasao a panagdangran ket gapu iti imon kalpasan a naamuan ti maysa kadagiti suspek a birbiruken ti biktima ti pagayam da a babai.
