LAOAG CITY – Inpetteng ni Mrs. Shiela Quimabao nga inosente ti asawa na a ni Dave Quiambao, maysa a tricycle driver ken residente dagitoy iti Barangay 1 iti ili a San Nicolas.
Ni Dave Quiambao ket natiliw iti drug buy-bust operation iti paset ti Barangay Raraburan ditoy ciudad ti Laoag.
Inbatad na ni Mrs. Quimbao nga awan ti madi a rekord ti asawa na ken saan a drug surrenderer daytoy.
Inlawlawag na a masdaaw no apay nga adda ti naala dagiti otoridad nga illegal a droga iti wallet ti asawa na idinto a daytoy ti nangiplastar sakbay a rimuar.
Uray ti ama ti akusado a ni Mr. Eddie Quimaboa ket inpasingked na nga awan ti bisyo ti anak na a ni Dave Quiambao.
Kabayatanna, inbatad ni Mr. Dave Quiambao nga adda ti naglugan kenkuana ken nagpaitulnog iti Barangay Raraburan ken apaman a nakadanun da ket iyawat ti pasahero na ti sangaribo a pisos ken nakita na nga adda ti mangpalawlaw kenkuana isut gapuna a nagtaray.
Nagtalinaed ti takder ni Quiambao nga awan ti illegal nga aramid na.
Kabnayatanna, Inbatad ni Police Supt. Mar Louie Bondoc, ti chief of police ditoy ciudad ti Laoag a nabayagen a monmonitoren da ni Mr. Dave Quiambao, residente iti Barangay 1 iti ili a San Nicolas mainaig iti illegal nga aktibidad na.
Segun ken ni Bondoc, uray ti PDEA ken PNP-San Nicolas ket nabayagen a sipsiputan da ni Quiambao.
Inlawlawag ni Bondoc a ni Quiambao ket karaman iti Street Level Target ti PNP-San Nicolas ngem namonitor da pay nga agop-operar ditoy ciudad ti Laoag.
Inpasingked ti opisyal a ti operasyon da ket legitimate ngem no adda ti reklamo ti akusado ket nakasagana da a mangsungbat.
Inpakaammo ni Bondoc nga isagsagana dan ti reklamo a maipila kontra ken ni Quiambao.
Immuna ti daytoy, natiliw ni Quiambao kalpasan a naglako ti maysa a sachet a naglaon ti maipagarop a shabu iti maysa a nagpammaran a poseur-buyer iti Barangay Raraburan ditoy ciudad ti Laoag.
Malaksid ti daytoy, iti panangkapkap dagiti otoridad ken ni Quiambao ket adda pay ti naala da a dua a sachet a naglaon ti maipagarop a shabu, sangaribo a pisos a marked money ken dadduma pay.
