LAOAG CITY – Nagun-od ti Mariano Marcos State University ti 100 a porsiento a passing rate iti September 2026 Psychometrician Licensure Examination.
Segun ken ni Prof. Romelyn Pabro, Department Chair ti Social Sciences and Bachelor of Science Psychology Program iti Mariano Marcos State University, adda ti 54 a nangala iti nasao nga eksaminasyon ken napalaus ti ragsak da gapu ta nakapasa da amin.
Inpanakkel ni Pabro a daytoy ti kaunaan a batch dagiti estudyante da a nangala iti kurso a psychology.
Malaksid iti pannakaipasa amin dagiti estudyante da iti eksaminasyon ket adda pay ti pito a top notchers nga isuda:
𝗧𝗼𝗽 𝟰: 𝗪𝗶𝗻𝗰𝘆 𝗔𝘆𝘂𝗻𝗼𝗻
𝗧𝗼𝗽 𝟳: 𝗠𝗮𝗿𝗶𝗮 𝗔𝗹𝘆𝘀𝘀𝗮 𝗖𝗮𝘀𝘁𝗶𝗹𝗹𝗲𝗷𝗼𝘀
𝗧𝗼𝗽 𝟳: 𝗠𝗮𝗿𝗸 𝗦𝘁𝗲𝗽𝗵𝗲𝗻 𝗜𝗽𝗮𝗰
𝗧𝗼𝗽 𝟴: 𝗥𝗶𝗰𝗸𝗮 𝗦𝗮𝗿𝗮𝗵 𝗚𝘂𝗺𝗮𝗿𝗮𝗻𝗴
𝗧𝗼𝗽 𝟴: 𝗠𝗮𝗿𝗸 𝗝𝗖 𝗣𝗮𝘀𝗰𝘂𝗮𝗹
𝗧𝗼𝗽 𝟵: 𝗔𝗿𝗶𝗲𝗹 𝗖𝗲𝘀a𝗿 𝗔𝗻𝘁𝗼𝗻𝗶𝗼, 𝗝𝗿.
𝗧𝗼𝗽 𝟭𝟬: 𝗠𝗼𝘆𝗿𝗮𝗵 𝗦𝗵𝗮𝗶𝗻𝗮 𝗖𝗼𝗹𝗼𝗯𝗼𝗻𝗴
Inadmitir ni Pabro a nupay makita da ti kapasidad dagiti estudyante da ken ti naan-anay a panagsagana ti unibersidad ket adda latta ti panagdudua da no magun-od ti unibersidad ti 100 a porsiento a passing rate iti Psychometrician Licensure Examination.
Daytoy ket gapu ta iti rekord ket awan pay ti unibersidad wenno kolehiyo a nakairekord ti 100 a porsiento a nakapasa iti pakasaritaan ti Psychometrician iti pagilian.
Inrakurak na ti panagballigi da ket resulta ti community effort gapu ta ado da a nagtitinnulong para iti daytoy.
Innayon na a narugyan paylaeng ti preparasyon dagiti estudyante da manipod elementarya, kasta pay no kasanu a pinadakkel dagiti nagannak da ken ti istrikto nga admission iti unibersidad kas ti maipatpatungpal a College Admission Test, pakairamanan ti naiget a monitoring da iti kada bolan no sadinno nga adda ti ipatpatungpal da a counseling.
Mainaig iti daytoy, inpakaammo ni Pabro nga adda ti ipatungpal da a programa ken pannakaiparada dagiti board passers ti unibersidad kas panangbigbig da kadakuada.
