LAOAG CITY – Inpetteng ni Mr. Pepito Alvarez, maysa nga historian ditoy probinsya a saan nga idiay ciudad ti Butuan ti nakaisayangkatan ti kaunaan a misa ditoy pagilyan.
Inlawlawag na a basar iti pakasaritaan, immuna a nakita ti grupo ni Ferdinand Magellan idiay Isla ti Samar ngem gapu ta awan ti paglandingan da ket naglikaw da a napan iti Limasawa, Leyte.
Naamoan a bayat ti panagdaldalyasat ti grupo ni Magellan ket nakakita nagpuur dagiti adda iti Limasawa kas senyales da nga adda ti sabali a tao a mapan iti lugar.
Nakita daytoy ni Magellan ken nakita na a napintas ti lugar a paglandingan da isut gapu na a napan da ken napintas ti panangsarabo kadakuada ti ari a ni Raja Kulambu.
Ditoy nga inbilin ti Kulambu ti pannakaiwayat ti casi-casi a ti kayat na a sawen ket agpadara ken ramanan da ti dara iti tunggal maysa.
Naamoan a Marso 29, 1621 a nakadanun da Magellan idiay Limasawa ken nairana a good friday ken naisayangkat ti umuna a misa iti bigat ti domingo idi Marso 31 iti isu met laeng a tawen.
Inbatad ni Alvarez a mismo a ti kakaisuna a chronicler ti grupo ni Magellan a ni Antonio Pigafetta ti nangibaga iti daytoy.
Segun ken ni Alvarez, ni Pigafetta ket saan nga historian no di ket chronicler wenno ti nangisursurat kadagiti amin a mapaspasamak iti grupo sipud pimmanaw da iti napanan da.
