Inpasigurado ni Dr. Loida Valenzuela, provincial veterinarian a natalged dagiti maparparti a baboy kadagiti slaughter house ditoy probinsya.
Inlawlawag na nga awan ti rumbeng a pagdanagan ti publiko gapo ta naiget ti panaginspeksiyon da kadagiti deliveries a dumalan iti quarantine section kas ti pammilin ni Gov. Matthew Marcos Manotoc iti pannakaipawil a maiserrek dagiti anyaman a maparti ken karne ti baboy ditoy probinsya.
Kuna ni Valenzuela a dagiti karne ti baboy a mailaklako iti merkado publiko ket aggapu ditoy probinsya idinto nga adda met dagiti sumagmamano a karne ti baboy a naiprossso kas iti ham a naggapo iti sabali a lugar.
Segun kenni Valenzuela, 8.2 a metrico tonelada ti insubli da manipud kadagiti importer gapo ta saan nasurot dagiti umno a dukomento.
Mainaig iti daytoy, inpasingked ti doktor nga adda ti makaumanay a suplay ti karne ti baboy agingga iti bulan ti Disyembre ditoy probinsya.
