LAOAG CITY – Balligi a naiwayat ti panagpirma ti Memorandum of Agreement wenno MOA iti nagbaetan iti city government ken iti pribado a kompania para iti pannakapapintas dagiti daycare centers ditoy suidad.
Segun ken ni Mayor James Bryan Alcid a maragsakan daytoy gapu ta agtultuloy nga umad-adu dagiti pribado a kompania a mangipaay ti tulong ditoy suidad.
Babaen ti nasao na memoramdum of agreement, mangipaay ti pribado a kompania ti pintura a mausar kadagiti development centers kadagiti nagduduma a barangay.
Innayonna pay a makaksid iti pannakapapintas dagiti centers ket makatulong pay daytoy tapno mamentenar ti kinapintas dagiti pagadalan dagiti ubbing.
Inpakaammo ti mayor nga iti inisial a maipaay iti city government a donasion ket agbalor ti P1.3 million
Gapu iti daytoy, nagyaman ni Alcid iti suporta iti nadakamat a pribado a kompania.
Maipalagip nga immunan nga adda ti maysa a pribado a kompania a nangipaay ti donasion a pintura a nausar iti Laoag City General Hospital ken merkado publiko iti kallebes.
